भैरहवा, १ फागुन । राष्ट्रिय जनमुक्ति पार्टीबाट रुपन्देही क्षेत्र नम्बर ३ का प्रतिनिधि सभा सदस्यका उम्मेदवार मोजिब अलीले भैरहवास्थित गौतमबुद्ध अन्तर्राष्ट्रिय विमानस्थल नियमित सञ्चालनको लागि आफूहरुसँग विशेष किसिमको योजना रहेको बताउनुभयो । उहाँले पार्टीले विमानस्थल सञ्चालन गराउनको लागि हाम्रो पार्टीले विशेष प्राथमिकतामा राखेको बताउनुभयो ।
शुक्रबार भैरहवामा रुपन्देही–३ को निर्वाचन सम्पर्क कार्यालयको उद्घाटन तथा घोषणा–पत्र सार्वजनिक कार्यक्रममा उम्मेदवार अलीले भन्नुभयो–‘अहिले क्षेत्र नम्बर ३ को पहिलो समस्या भनेको अरबौं लगानीमा निर्माण भएको गौतमबुद्ध अन्तर्राष्ट्रिय विमानस्थल नियमित सञ्चालन नहुँदा व्यावसायिक धाराशायिक बनेको छ युवाहरू विदेश जाने बाध्य भएको छन्। विमानस्थल सञ्चालनमा गराउन सके भने युवा हरू रोजगारी सिर्जना हुन सकिन्छ।
पार्टीका केन्द्रीय सचिव समेत रहनुभएका अलीले यस क्षेत्रका उद्योगी–व्यवसायी, किसान तथा विभिन्न वर्गका समस्याहरु रहेको र ती समस्या समाधानका उपायहरु पार्टीले प्याकेजमै नागरिक सम्बोधन–पत्र (घोषणापत्र) मा राखेको जानकारी दिनुभयो । ‘घोषणापत्रमा समावेश गरिएका विषयहरु सम्बोधन र अक्षरस पालना गर्न हामी इमान्दार छौं । राष्ट्रिय जनमुक्ति पार्टीले आफ्नो स्थापनाकालदेखि घोषणापत्रहरुमार्फत हामीलाई एकपटक मौका दिनुहोस्, यो देशको मुहार फेर्न र विकास गर्न र उहाँको जस्तोसुकै समस्याको समाधान गर्नका लागि प्रतिबद्ध र इमान्दार छौं भन्दै आएका छौं, ’अलीले जानकारी गराउनुभयो।
