भैरहवा, १४ फागुन । २०८२ वैशाख ३० गते राष्ट्रिय प्रजातन्त्र पार्टी (राप्रपा) परित्याग गर्नुभएका रुपन्देही जिल्ला उपाध्यक्ष अजय कुमार गुप्ता पुनः पार्टीमा फर्कनुभएको छ । गुप्तालाई बिहीबार भैरहवामा आयोजित कार्यक्रममा रुपन्देही क्षेत्र नम्बर ३ का प्रतिनिधि सभा सदस्य उम्मेदवार क्याप्टेन गौरव बोहरा, केन्द्रीय सदस्य बसन्त विक्रम शाही, केन्द्रीय सदस्य तथा समानुपातिक उम्मेदवार स्वाती थापा, रुपन्देही जिल्ला अध्यक्ष सागर प्रताप राणालगायतले पार्टीमा स्वागत गर्नुभएको हो ।
उहाँले नेपालको राजनीति अहिले गम्भिर मोडमा रहेको बताउनुभयो । गुप्ताले राजसंस्था र हिन्दूराष्ट पुर्नस्थापनाका लागि हामी अगाडि बढेको बताउनुभयो । ‘राप्रपा आफ्नो एजेण्डामा स्पष्ट छ, राप्रपा मेरो पुरानो पार्टी हो, ’उहाँले बताउनु भयो ।
कार्यक्रममा बोल्दै नेता गुप्ताले विगत ८ वर्षदेखि आफू राप्रपामा क्रियाशील भएको बताउनुभयो । ‘९ महिनापछि पार्टीको सक्रिय राजनीतिमा फर्किएको छु, हिजोको दिनमा हामी के कारणले टाढा भयौं, त्यो पछिको कुरा हो । जेनजी आन्दोलनपछि धेरै कुरा जलेर गयो, त्यसमा रिस, खराब विचारहरु, देश, समाजप्रति गलत मानसिकता पनि जलेर गएका छन् । राष्ट्र, राष्ट्रियता, प्रजातन्त्र तथा राप्रपाले बोकेको एजेण्डा राजसंस्था र हिन्दूराष्ट मेरो पनि एजेण्डा हो, ’गुप्ताले जानकारी गराउनु भयो ।
