बुटवल, २६ चैत । रुपन्देहीको बुटवलमा फोहोरमैला व्यवस्थापनको समस्या जटिल बन्दै गएपछि वडा तहबाटै दीर्घकालीन समाधान खोज्ने पहल सुरु भएको छ । तिनाउ पश्चिम क्षेत्रका वडाहरूले ल्याण्डफिल्ड साइट निर्माणका लागि उपयुक्त जग्गा खोज्न सक्रिय रूपमा छलफल थालेका छन् । तिनाउ पश्चिमको फोहोर तिनाउ पश्चिमकै वडामा व्यवस्थापन गर्ने लक्ष राखिएको छ । बुटवल उपमहानगरपालिका वडा नम्बर ७ र ८ ले शिवनगर सामुदायिक वन क्षेत्रमा फोहोर प्रशोधनसहितको व्यवस्थापन केन्द्र स्थापना गरी सञ्चालनमा ल्याइसकेका छन् । तर, अन्य वडाबाट संकलित फोहोर भने तिनाउ नदी किनार मजुवामा फालिँदै आएको छ । केही दिनअघि स्थानीयबासीको विरोधका कारण त्यहाँ तनाव उत्पन्न भइ फोहोर संकलन र व्यवस्थापन कार्य अवरुद्ध भएको थियो । पछि उपमहानगरपालिका र स्थानीयबीच सहमति भएपछि पुनः सेवा सुचारु गरिएको छ यता तिनाउ पश्चिमका वडा नम्बर १२ र १३ ले आफ्नै क्षेत्रमा फोहोर व्यवस्थापन गर्ने उद्देश्यसहित ल्याण्डफिल्ड वा डम्पिङ साइट निर्माणका लागि जग्गा खोजी तीव्र पारेका छन् । यस अभियानमा साविक सेमलार गाविस अन्तर्गतका वडा १४, १५ र १६ समेत समावेश हुने सम्भावना रहेको जनाइएको छ । वडा नम्बर १२ तामनगरस्थित कोरियन टेक्निकल इन्ष्टिच्युटको उत्तरतर्फ रहेको चारपाला सामुदायिक वन उपभोक्ता समूहको क्षेत्रमा प्रारम्भिक अध्ययन सुरु गरिएको छ । साथै ढवाहस्थित मिलनपार्कको उत्तरतर्फको वन क्षेत्रमा पनि उपयुक्त जग्गा रहेको दावी गरिएको छ ।