दाङ, १० जेठ । लुम्बिनी प्रदेश सरकारका आर्थिक मामिला तथा योजना मन्त्री धनेन्द्र कार्कीले आगामी आर्थिक वर्षको बजेट कार्यान्वयनमुखी, नतिजामुखी र व्यवहारिक बनाइने बताउनुभएको छ ।
लुम्बिनी प्रदेश सभाको आठौं अधिवेशन अन्तर्गत आइतबार बसेको पाँचौं बैठकमा ‘लुम्बिनी प्रदेश सरकारको विनियोजन विधेयक, २०८३ का सिद्वान्त र प्राथमिकता’ माथिको छलफलका क्रममा उठेका प्रश्नहरुको जवाफ दिँदै मन्त्री कार्कीले प्रदेशको आवधिक योजनाले निर्दिष्ट गरेका संकल्प र प्रदेश सभा सदस्यहरुले दिएका सुझावका आधारमा बजेट निर्माण गरिने उल्लेख गर्नुभयो ।
उहाँले पर्यटन, उद्योग र रोजगारीलाई प्राथमिकतामा राखेर कार्यक्रम ल्याइने बताउँदै पूँजी तथा प्रविधिको विस्तारमा विशेष जोड दिइने जानकारी दिनुभयो । कृषि क्षेत्रको आधुनिकीकरण, प्रांगारिक उत्पादन प्रवद्र्धन तथा उत्पादनमा विविधिकरणमार्फत रोजगारी र आयआर्जन सिर्जना गर्ने नीति सरकारले लिएको उहाँको भनाइ थियो ।
मन्त्री कार्कीले बजेटलाई प्रभावकारी र कार्यान्वयनयोग्य बनाउने विषय सबैको साझा सरोकार भएको उल्लेख गर्दै कार्यान्वयनमा नवीनता ल्याइने बताउनुभयो ।
बैठकमा प्रदेश सभा सदस्यहरुले समसामयिक विषयमा विशेष समयमा धारणा राखेका थिए । विशेष समयमा प्रदेश सभा सदस्य बैजनाथ कलवार, दिल कुमारी बुढा, तारा थापा, रेवती गुरुङ, चन्द्रकेश गुप्ता, मिना बुढा मगर, शान्ति लोध, मिना कुमारी श्रेष्ठ, मधुसुदनशरण चौधरी (कुर्मी), सुरुल पुन तथा बसन्ती न्यौपानेले विभिन्न विषयमा धारणा राख्नुभएको थियो ।
छलफल सम्पन्न भएपछि सभामुख तुलाराम घर्तीमगरले ‘लुम्बिनी प्रदेश सरकारको विनियोजन विधेयक, २०८३ का सिद्धान्त र प्राथमिकता’ माथिको छलफल समाप्त भएको घोषणा गर्नुभयो । प्रदेश सभाको अर्को बैठक जेठ ११ गते सोमबार दिउँसो १ बजे बस्नेछ ।